आश्विन कृष्ण तृतीयाः बसुन्धरा देवीको व्रत बसी गरियो पूजा आराधना

काठमाडौँ, १३ असोजः लुमधी भद्रकाली महिला समूह (निशा पुचः)को आयोजनामा टेबहालस्थित सङ्कटा मन्दिर परिसरमा बसुन्धरा व्रत पूजा गरिएको छ ।

सुस्वास्थ्य एवं सुख, शान्तिको कामनाले यो व्रत गर्ने परम्परा रहेको सबलबहालका सिद्धिमुनि बज्राचार्यले जानकारी दिनुभयो ।

प्रत्येक वर्ष आश्विन कृष्ण तृतीयाका दिन यो व्रत एवं पूजा गर्ने विधि रहेको छ । यो व्रत, पूजा बसुन्धरा र स्वयम्भूमा पनि गरिन्छ ।

तीनै स्थानमा सामूहिक रूपमा यो व्रत एवं पूजा गर्ने परम्परा रहेको छ । यो व्रत एवं पूजामा बसुन्धरा देवीको विशेष आराधना गरिन्छ ।

टेबहालस्थित सङ्कटा मन्दिर परिसरमा भने आज ११३ जना व्रतालुले पूजा, आराधना गरेको लुमधी भद्रकाली मन्दिरका पुजारी गणेशबहादुर महर्जनले जानकारी दिनुभयो ।

देश र पारिवारिक सुख, शान्तिको कामनाले पनि यो व्रत एवं पूजा गरिने प्रचलन रही आएको छ । यो व्रत एवं पूजासँग एउटा किम्बदन्ती पनि जोडिएको छ ।

प्राचीनकालमा सुदर्शन नामका राजा थिए । राजाका दुई श्रीमती थिए । कान्छी श्रीमतीको खराब भावना थियो । राजा कान्छी श्रीमतीको पक्षमा लागेर भोग बिलासमा केन्द्रित हुँदा देशमा अनावृष्टि भयो ।

जनतामा हाहाकार भयो । खान नपाउने अवस्था बन्यो । जेठी रानीले बसुन्धरा देवीको व्रत बसी पूजा, आराधना गरेपछि वृष्टि भयो ।

त्यसपछिदेखि नै प्रत्येक वर्ष आश्विन कृष्ण तृतीयाका दिन बसुन्धरा देवीको व्रत बसी पूजा, आराधना गरेर यो कथा सुन्ने परम्परा सुरु भएको हो ।

आश्विन कृष्ण तृतीयाका दिन बसुन्धरा देवीको व्रत बसी पूजा, आराधना गरेपछि चतुर्थीका दिन बिहान सुन्धारामा गएर स्नान गरेपछि व्रत विधि पूरा हुन्छ ।

सुन्धारामा पानी नआउने भएकाले बाल्टीमा पानी लगेर स्नान गर्नुपर्ने बाध्यता रहेको भद्रकाली मन्दिरका पुजारी महर्जनले दुःखेसो गर्नुभयो ।