काठमाडौँमा आज इन्द्रजात्राको मुख्य रथयात्रा, कुमारीसहित गणेश र भैरवको रथ तानिँदै

काठमाडौँ, असोज ९ । काठमाडौँको ऐतिहासिक हनुमानढोका क्षेत्रमा आज इन्द्रजात्राको मुख्य रथयात्रा हुँदैछ । आठ दिनसम्म मनाइने इन्द्रजात्राअन्तर्गत आज जीवित देवी कुमारीसहित गणेश र भैरवका रथ काठमाडौँका पुराना बस्ती हुँदै तानिँदैछन् ।

इन्द्रजात्रा असोज ७ गते हनुमानढोकास्थित कालभैरव क्षेत्रनजिक यःसिं अर्थात् इन्द्रध्वज ठड्याएसँगै औपचारिक रूपमा सुरु भएको थियो । यस वर्ष बिहान ७ः४७ बजे यःसिं ठड्याइएको थियो । त्यसपछि विभिन्न धार्मिक अनुष्ठान, लाखे, पुलुकिसी, महाकाली, भक्कु तथा अन्य परम्परागत नाच र सांस्कृतिक गतिविधि हुँदै आएका छन् ।

आजको मुख्य आकर्षण कुमारीको रथयात्रा हो । कुमारीलाई गणेश र भैरवको रथसँगै पुरानो काठमाडौँका सडकमा परिक्रमा गराइन्छ । स्थानीय महिलाको नेतृत्वमा यी देवदेवीका रथ तान्ने परम्परा पछिल्लो १४ वर्षदेखि निरन्तर रहेको छ ।

वर्षा र समृद्धिका देवता इन्द्रसँग सम्बन्धित इन्द्रजात्रा काठमाडौँ उपत्यकाको नेवार समुदायको महत्वपूर्ण सांस्कृतिक पर्व हो । हिन्दू र बौद्ध दुवै परम्परालाई समेट्ने यस पर्वमा धार्मिक अनुष्ठानसँगै परम्परागत संगीत, मुखौटा नृत्य र रथयात्राले काठमाडौँको पुरानो सहरलाई उत्सवमय बनाउने गर्छ ।

इन्द्रजात्राको अन्तिम दिन यःसिं ढालेर पर्व समापन गर्ने परम्परा छ । समापनका अवसरमा राष्ट्र प्लेरमु जीवित देवी कुमारीबाट टीका तथा आशीर्वाद ग्रहण गर्ने चलनसमेत रहेको छ ।

कतिपय स्थानीय गुठियार र समुदायका प्रतिनिधिहरुले भने विगतमा झै‌‌ कुमारीबाट टीका र आशीर्वाद ग्रहण गर्न परम्परागत राजसंस्थाकै प्रतिनिधित्व हुनुपर्ने भनि माग समेत हुँदै आएको छ ।