AI Symbolic Photo
काठमाडाै, कार्तिक ९ ।
संयुक्त राज्य अमेरिकाको क्याथोलिक चर्चको इतिहासमा हालसम्मकै एक ठूलो र गम्भीर कदम चालिएको छ।
न्यूयाेर्क महाधर्मप्रान्तले पादरीहरूबाट दशकौँसम्म यौन दुर्व्यवहारमा परेका पीडितहरूलाई ८० कराेड अमेरिकी डलर क्षतिपूर्तिस्वरूप तिर्ने गरी ऐतिहासिक सहमति गरेको छ।
यो सम्झौताले लामो समयदेखि न्यायको पर्खाइमा रहेका हजारौँ पीडितहरूका लागि मात्र नभई समग्र धार्मिक संस्थाभित्र पारदर्शिता र उत्तरदायित्वको मुद्दालाई पुन: एकपटक केन्द्रबिन्दुमा ल्याएको छ।
याे बहुप्रतीक्षित कानुनी सम्झौतामा पीडितहरूलाई कुल ८० करोड अमेरिकी डलर राहत तथा क्षतिपूर्तिस्वरूप उपलब्ध गराउने मुख्य निर्णय भएकाे छ ।
याे मुद्दामा १,३०० जना यौन दुर्व्यवहारका पीडितहरू रहेका छन्। उनीहरूले बाल्यकालमा पादरी तथा चर्चका अधिकारीहरूबाट भोगेको याैन दुर्व्यवहार बापत यो क्षतिपूर्ति पाउनेछन्।
अमेरिकी क्याथोलिक चर्चको इतिहासमा भएका क्षतिपूर्ति प्रकरणहरूमध्ये यो आर्थिक रूपमा सबैभन्दा ठूला र महत्त्वपूर्ण घटना हाे ।
तर, यो सम्झौता रातारात बनेको होइन। यसको पछाडि पीडितहरू, उनीहरूका कानुनी सल्लाहकारहरू र अधिकारकर्मीहरूको दशकौँ लामो सङ्घर्ष जोडिएको छ।
न्युयोर्क राज्यमा ल्याइएका नयाँ कानुनी प्रावधानहरू, जसले पुराना यौन दुर्व्यवहारका घटनाहरूमा पनि मुद्दा हाल्ने म्याद वा ‘स्टेटूट अफ लिमिटेसन’ केही समयका लागि खारेज वा खुकुलो पारे पछि चर्चविरुद्ध थुप्रै उजुरीहरू दर्ता भएका थिए।
दशकौँसम्म मौन बस्न बाध्य पारिएका वा आफ्ना आवाजहरू दबाइएका पीडितहरूले अदालतको ढोका ढकढकाएपछि महाधर्मप्रान्त यो विशाल क्षतिपूर्ति दिन बाध्य भएको हो।
यसले एकातिर चर्चको प्रतिष्ठामा ठूलो ठेस पुर्याएको छ भने अर्कोतिर पीडितहरूलाई न्यायको अनुभूति गराउने दिशामा एउटा बलियो खुट्किलो पारिएको छ।
यस प्रकारका ठूला क्षतिपूर्ति प्रकरणहरूले केवल चर्चमाथि आर्थिक भार मात्र पर्दैन, बरु यसले धार्मिक संस्थाको साख, विश्वास र आन्तरिक संरचनामाथि गम्भीर प्रश्नचिह्न खडा गरेकाे छ।
यति ठूलाे रकम जुटाउन महाधर्मप्रान्तले आफ्ना सम्पत्तिहरू बिक्री गर्न, कोषहरू समायोजन गर्न तथा विभिन्न वित्तीय रणनीतिहरू अपनाउनु पर्नेछ।
समाजमा नैतिक शिक्षा र मार्गदर्शन दिने संस्थाभित्रै यस्ता जघन्य अपराधहरू हुनु र तिनलाई लामो समयसम्म लुकाउन खोजिनुले चर्चको नैतिकतामाथि ठूलो प्रश्नचिन्ह खडा गरेकाे छ।
भविष्यमा यस्ता घटना दोहोरिन नदिन चर्चभित्र कडा आन्तरिक नियन्त्रण, छानबिन समिति र बाल सुरक्षा नीतिहरू कडाइका साथ लागु गर्नुपर्ने दबाब बढेको छ।
अधिकारकर्मीहरुका अनुसार केवल आर्थिक क्षतिपूर्तिले मात्र पीडितहरूले भोगेको मानसिक, शारीरिक र भावनात्मक पीडालाई मेटाउन सक्दैन। त्यसैले, पीडितहरूका लागि मनोसामाजिक परामर्श, स्वास्थ्य उपचार र उनीहरूको सामाजिक पुनर्स्थापनाका कार्यक्रमहरूलाई पनि यस सम्झौता सँगसँगै अगाडि बढाइनुपर्ने माग गरेका छन्।
याे घटनाले महत्वपूर्ण र दीर्घकालीन नजिर स्थापित गरेको छ कि कानुन र न्यायको दायराभन्दा कोही पनि माथि छैन, चाहे त्यो जतिसुकै ठूलो र प्रभावशाली धार्मिक संस्था र व्यक्ति नै किन नहोस्।
यो कदमले अन्य राज्यहरू वा विश्वका अन्य भागहरूमा पनि न्यायको खोजीमा रहेका दुर्व्यवहारका पीडितहरूका लागि एउटा बलियो मार्गप्रशस्त गर्नेछ र संस्थागत अपराधका विरुद्ध बोल्न थप हौसला प्रदान गर्नेछ।
